احمد فراز

رنجش ہی سہی دل ہی دُکھانے کے ليے آ
آ پھر سے مُجھے چھوڑ کے جانے کے ليے آ

پہلے سے مراسم نہ سہی، پھر بھی، کبھی تو
رسمِ رہِ دُنيا ہی نِبھانے کے ليے آ

کِس کِس کو بتائيں گے جُدائی کا سبب ہم
تُو مجھ سے خفا ہے تو زمانے کے ليے آ

کچھ تو مِرے پندارِ محبّت کا بَھرَم رکھ
تُو بھی تو کبھی مجھ کو منانے کے ليے آ

اِک عُمر سے ہُوں لذّتِ گِريہ سے بھی محرُوم
اے راحتِ جاں! مجھ کو رُلانے کے ليے آ

اب تک دلِ خوش فہْم کو تجھ سے ہيں اُميديں
يہ آخری شمعِ بھی بُجھانے کے ليے آ

مانا کہ محبّت کا چُھپانا ہے محبّت
چُپکے سے کسی روز جتانے کے لئے آ

جیسے، تجھے آتے ہیں نہ آنے کے بہانے
ایسے ہی، کسی روز نہ جانے کے لئے آ

احمد فراز